香港新浪網 MySinaBlog
« 上一篇 | 下一篇 »
AboutMovie | 08-May-18, 11:46 | 02. 外語電影

一套睇時睇得好開心嘅同志青春片。不過可能一切都好好,出返嚟呢個現實,個落差咁大,就灰灰地,不過,電影就係係咁咖啦。我記得返,以前我點解鍾意睇戲,係因為我可以去到另一個世界。


故事背景雖然係依家嘅年代,但反而覺得好似睇緊一齣幾舊幾純嘅戲,係,裏面唔好似為有現代嘅開放到青少年個個性愛亂晒籠又party又吸毒又男男女女都露晒嘅嘢睇,睇緊時都有啲覺得點解咁唔「典型」嘅。


而呢種既有嘅印象,係令我對今時今日睇呢齣戲時有啲覺得奇怪,就係come out呢樣嘢。我真係以為,乜依家仲會有仲讀緊書嘅後生仔,煩緊呢樣嘢咖咩?我真係以為,呢一代嘅後生仔,尤其係同性戀嘅後生仔,佢哋已經好幸福,依家唔會再使好似以前啲《美少年之戀》呀《斷背山》呀咁睇到個心實咗。


------ 劇透------


 

但係去到差唔多尾,當主角Simon同另一個早就come out咗嘅男同學講,話佢好似好容易就做到,但佢唔得,而嗰位同學同佢講,點會易呢?然後佢就講咗一啲背後至知嘅辛酸出嚟。係去到呢度,我至突然覺得,係我誤會咗,其實就算我見依家香港中學又好大學又好嘅come out咗嘅人,佢哋背後要受嘅嘢,我哋係唔知道,只係我以為依家已經去到一個好美好嘅時代,其實仲未係。


而Simon反而以佢屋企嘅背景,至應該完全唔驚一早講至啱,但可能人就係咁,心魔其實係喺自己度。最得意嘅係其實佢係被迫破除呢個心魔,有時有啲嘢,好似咁樣至反而會有好嘅轉變,自己一路都唔郁,就分分鐘成世都係咁,呢樣嘢其實套用喺乜嘢人都好,乜嘢嘅心魔都好,都係幾適用。


雖然睇完出返嚟個現實係灰灰地,不過都幾高興係有呢齣戲,開心唔沉重嘅同志青春戲,又再出現返。

 

dieman

留言(2) | 引用(0) | 話題(點睇)

[1]

只係我以為依家已經去到一個好美好嘅時代,其實仲未係。I totally agree with you. As a secondary school teacher, no student / teacher comes out as gay. There is still a long way to go before there is equality.

Also, I think the film will have been more successful if more handsome male characters had been chosen.

P.S. Waiting for your "2018-05-10 香港上映" movie list. Thanksssssssss!


[引用] | 作者 Kenji | 09-May-18 13:04 | [舉報垃圾留言]

[2]

多謝你嘅留言。

依家交友軟件多,識人嘅途徑又多,青少年似乎比以前多咗好多選擇,而佢哋思想係同以前唔同咗,但社會其實仲係處於舊同保守嘅狀態。

我以為佢哋會比十幾年前嘅人開心,但其實諗深一層,佢哋思想唔同,但可惜社會嘅保守相對比十幾年前更甚嘅話,係仲辛苦。

AboutMovie
[引用] | 作者 AboutMovie | 09-May-18 21:08 | [舉報垃圾留言]